باب الأوضة

ورسمت


علي باب الاوضة المنسية عيونك


وقعدت اتأمل فيا شوية


وخدتني سنين


وسنين البحر مايتعدوش


وده مين هايحوش


لو قامت جريت أيامي عليا


فكيت أحلامي


من حبل أمبارح كان معقود


ومشيت وياها لأخر الشارع


وحكينا لبعض


وغصبنا الليل يستسلم ساعة


لحكاوينا


وضحكنا وضَحكنا الدنيا


مديت الشوف


فـ لمحت ظروف


بتطوف في الجو


والريح بتعكر لون الجاي


وتطفي الضي


الشارع مغلوب علي أمره


والخطوة مخطوفة م الخوف


وبراحنا انا وانتى بيتداري


والضي يعافر


لخفنت كلامي في جوفي


جريت


غفلني طريقي


نسيت ... فـ بكيت


ورجعت لـ باب الأوضة المنسية


بصيت فـ عيونك


واتغطيت

نهاية النص

شديت رِحالي ... واشتهيت
الضلمة تكتبني فـ قصيدة
من قصايد الموت

।
।
।

ودع حضورك ...
والدروب
واشتياقك للشتا
واتأمل اللي ياما زهقت منه
فـ المرايا

ضفر ساعاتك
واستخبي
مـ الرهبة ....
قطرة من طوفان الجاي


الغربة ...
رعشة طفل خايف
من سواد البحر

حدوتة اتحكيت له عن
اساطير الزمان

...

أمنا الغولة
هاتظهر للي يتشاقي
ومايسميش
قبل المنام والأكل

...

أوضة الفيران
دايماً عقاب اللي اشتهي
المتعة ...
وحب يعيش

...

إزاي مفيش
يصرخ يقول الطفل :
مش خايف
يلقي كفوف حراسه علي وشه


...


عفاريت حيطانك
رسمت شقاك ... فـ تشققت
زهقت فـ هاجرت
ضلك المحدوف سنين
الأرض تعبت
حضنك الخايف مواسم
حظك المنحوس


ودع سواقي الشعر والصورة
وادفن معاجمك والكتب
واياك تقول
الشعر حاجة
الشعر مايأكلش عيش
قرطس قصايدك ... واستخبي
والدفنة
قطرة من طوفان الجاي