مستني ايه
ما ترد باب الريح
واسرح
فـ براحك الضيق
واطفي ايقاع الرقصة
واتلعق
وارضي بخسارة مفروضة ع اللعبة
واخلق من خيالك طيف
يشرب معاك الشاى
واستني ساعة واتكل لحظة
واغطس وماتقبش
أغسل ملامحك
من تراب سفرك اللاجئ علي جبينك
واتوضا للزحمة وفوت
ما الفرض كفر عن ذنوب الروح فـ احلامك
أشرب عيون الصبح
فـ جزيرتك
واغزل تفاصيلك مع الدخان
وارسم طفولتك وافتكر
لحظة ماتلمحك الشوارع
وامك تواصيك الأدب
وهي مادة ايدها ليك بالسنتدوتش
وتخطي خطوة من بعد خطوة وتروح بعيد
تلتفت كالعادة يمكن تصعب عليها خطوتك
فتملي يمنع ضباب العند راحتك
من الشنطة علي كتفك
فتطاطي راسك وتسترسل فـ خطواتك
إذ صوت يشاغلك من بعيد يهمس في ودنك
بـالسلامة
" بس توعدني
مسافة السكة تبعتلي جواب "
_ مسافة سكتي
خطوة
يدوب تلحقني
بعد العمر ده بعمرين
أنزل
وفتش عن غريب زيك
وارفض تصاحب نفسك الأمارة بالوحدة
و جاري عقارب الساعة
واصبر
مواسم غربتك هانت
بكرة مدينتك تعرفك
وتعشق صبايا الورد
ألوانك
وتنتبه ليك القصيدة
املك ساعاتك المرمية
ع الأسفلت
كَحل عيونها بلهفة عرقك المهدور
علي جبينك
لـ طراوة تخطف غلبك الحران
من الزحمة
وامسحها بكل اسبابك .... شقا
بكرة أكيد راح تحصد المطروح علي شجرك
سامع نايات الشجر
بتغازل العصافير
سلم حواسك للحكاية والنغم
وحلاوة المغرب ورقصة اللحن اللي فايح
من طريق سكران علي الكورنيش
أحضن حارات الناس وشوارعهم
واسرح و توه
واطفي ايقاعك
ده تقيل علي رقصتك
وعلق حلمك الغرقان بـ قشاية
واغطس وماتقبش
سلام
