مزج ما قبل الهجرة
انا مستحيل يتجلي مني القصد
أنا تصريفات الظن والحيرة
ما بقولش حركات المعنى طبيعية
وصورة الضل ع المدي عندي
ماهيش إلا خيال ضيق
علي الأرجح ماهوش بالضل
وحيث الشكل لسه
بيشهد ع الثبات
فانا لسه بعند فـ الغيب وفـ التفسير
وبستسلم لـ قعر السر ومابسألش
عشان سؤلاتي مردودة
وبين رجل الغايات باقي
وبين احوال الضباب .. دلالات
وأخر الوقت .. مستنيني فـ محطة
ويسعدني الفراق جداً
ماهو نكهة المسافات
دليل ع المغفرة
من ذنوب القرب والشفعة
حقيقة الأمر لا تخلو من الهذيان
ومن عوم الهواجس في لحظة مد للمواويل
***
هامش
شط الميعاد تحت البحور .. غرقان
شق الهبوط .. الشرق
شق الهبوط .. الغرب
أسس خريطتك من جديد
فتش عن اتجاهات تفصل موقفك
مطرود .. هاتفضل من رحمة اللون فـ المرايا
معصوم من التسليم لأشباه الجمل .. ملعون
وشك ماهوش حمل الجواب .. تجاعيد
***
جفت أواخر كل شئ
اليبس شق الريح سبق
ملكت كفوفه الرفض والحيلة
والأصفر الفاقع ما سرش .. ناظريه
من فين طريقك يا صبي ... ولفين ؟
من قد إيه فـ السكة دي ماشي
احكيلي قول
فطمني ع التفاصيل
الليل ضرير والعين ما شايفاشِ
بص الغلام للدم علي يده
قالي ده دمك ... وانت مرمي هناك
***
الشجرة قلعوها
والبيعة غير ملزمة
يثرب دخلها الروم
طار الخبر ..
قالت الحمامة لـ نوح
البر جاهز للطوفان
فيرد نوح
والعجب واخد براحه فـ عيون الملايكة والسما
طب ليه تكون هجرة
ولإيه تكون
ده معدش فاضل م الرسالة
غير رتوش
***
ومَا ضَرّنَا أنّا قَلِيلٌ وجَارُنَا .. عَزِيزٌ وجَارُ الأكْثَرِينَ ذَلِيلُ
قال السموأل
واتكحلت عين المعاني بالقصيد
والقصد م الهجرة .. انتصار
والجيرة مع كترها
رفضت / كفروا ببعض الكتاب
نكروا علينا الخروج وغمضوا سيوفهم
واتقفل باب المدينة / فرضوا علينا التيه
صبراً .. علي التيه يا فرس
لسه المدينة ع المدي رافضة الظهور
قالوا الخراب .. مَيّل علي المسافات
فـ اصبر معايا ع السكك
لو كت عينيك
بتشوف تدابير القدر
كان اختيارنا هايختلف
***
مزج ما بعد الهجرة
دار الكلام بين الفرق والناس ضلال
اقصي الطريق ضلمة
والخطوة بتقدم سواد
ساعة الصحاري .. سنين
والمية حلم العمر للسالك
والضل من روح النهار
عزف التاريخ كل اسرار الحكاية للحاضرين
لكن خيانة الحق واجب .. اجتناباً للفتن
فلا يجوز الضي في نظر العوام
قال الإمام / الأمير .. بعد الصعود :
من قال لي اتقِ ضربت عنقه
فكان القهر فـ الأيام
***
أحوال في قعر الهاوية
مترتبة العبارات
كل الوضوح شاهد علي اللي كان
من كان منكم مستقيم ..
للحق اشارات تُتَبع
والمسافة رموز
والحقيقة .. زهد السما للأرض
فإزاي تفصل م الهوى
حق .. لو بص فـ مرايته اتصدم
***
غلبت طباع الصورة ع المادة
مبقتش شايف من عكرة الأيام
مغزي من المسافات
وش الحاجات مقلوب
نقص ابتدي ومازال بياكل بالظنون
والحيرة فخ
والسر مهجور م الزوايا
والقول طلاسم والوميض وسواس
****
هامش
كل المواسم بوابات .. دهشة
كل العواصم كان اساسها الدم
عين الحواري فـ الغياب سارحة
وفرض الغياب يثبت تمام الدين
****
فتحت شبابيك الطريق
بيني وبين البداية
ايقاع / صدي
وهم الخروج من وهم عصمة فـ عقول الناس
وبيني وبين الوهم .. شهقة
عزم الرحيل ..
لابد من خلع العيون ..
كل العيون .. ناقصة فـ رؤية الأشياء
برئ الضي .. من ذنب العيون والشوف
وبيني وبين العزم .. سكة / مسافة عمر بيني وبيني
ازاي اشوفني فـ المرايا .. انا
وانا تصريفات الظن والحيرة
