دخان سيجارة

أخاف ..

من خطوة لو خطيتها 

مش ليا

وأخاف من صبح ..

يلقي الشمس مكفية

وأخاف من بابا

أخاف أفتح .. ألاقي 

خراب




وكانت أول القصيدة .. كفر

وبما أن العنكبوت عاند

حضنت خيوطه زاوية حيطان

زوقتها بـ نفسي

إذن

أعلنت حربي فـ اتجاه السقف

وخرجت من كل الجسد

ولبست وش ساقطة عيونه م الحشيش

خربان



خايف سيجارتي ماتكفنيش مسافات

إزاي اخطي والدخنة مني بعيد

القهوة ملهاش شكل 

و وشها ثابت

والبن كشف الزن فـ دماغي

وغنى لقعدة كنت احضرها واتسامر



العنكبوت سلم

فاتت جنبنا فـ ساعة حرب بضفاير

بصيت عليها .. شبهتها بالموج

بصت عليه .. منظرلهاش

فتقدمت ليا

ورفعت كفها ...  صدفة

فـ اتجاه السقف .. فاق

هتك الحكاية .. فضها بزفير



نفس

مفضلش غير حدوتة فـ الرمق الأخير

شد بضمير التيه .. وتوه

سافر

انفد بجلدك من مرايا

مش بتعكس غير احتمال

احتمال أنك هناك.. 

واقف بعيد عن أي ضي

وأن اللي مفروض ع النظر

رد فعل طبيعي جداً للتعب

و لأول النص اللي خايف م السؤال