 |
| سبارتاكوس |
فجأة براسه من الشبابيك
قطع توب الخوف و بسيفه
حضر شبح الموج جواه
دق طبول الفجر وقرر
يصبح عنتر
غلب العتمة في عينه وفتح
شاف المنظر
نادي في كل الخلق وكبر
( صلبوا نداه )
عرف المعني
في لبس العسكر
لما اتعكر
بان الدم
شاف الهم
وهو بيكتم ع الانفاس
فكره احتاس
عزمه انداس
حلمه اتبعتر
نخ وفكر
يهرب ... يجري
من ملكوت الجرح ودَوّر
بين البين
فتش عن معقول ... يتحقق
عينه تدقق
في التفاصيل
يلقي الجاي
قدامه عليل
يبعد ... يرجع
ماضي بيوجع
ينفي ويقطع
أى سبيل
زهق الفارس
اصبح وارث زي الزحمة
الصمت له دين
غمض سيفه
صحي بخوفه
العتمة و تاه
بين مرايات
البيت و الغربة
وصوت ايقاعات
اللحن الغايب
من مواويله
شاف قناديله
بتهجر ليله ورا الشبابيك
فكر يطلع تاني يناضل
فيك يا طريق
لكن ذكري الدم
الضايع فوق أراضيك
خلاه يحضن يأسه
ويرضي بحاله يضيق
آه كان فارس
فارس طالع
فجأة براسه م الشبابيك
قبل ما حتي يلاقي حروفه
ويعرف ينطق
ضاع في زحام الدنيا
ومات
ليست هناك تعليقات:
إرسال تعليق