نزل المطر مواويل
قام فـ الزحام سارح
فرش الشوارع نيل
وحكاية ومطارح
أمر الزمان ساخر
غاوي يعيد ويزيد
والخلق تتعجب
ويقولوا دي مواعيد
وتنام وتصبح تنام
تفتكروا ايه هايفيد
يا قصر عالي مكملوش فيه بنا
شَيّعت كام مرة
والناس تقول حاسب
السكة دي صعبة
بالعقل نتحاسب
روحتوا اشتريتوا كبير
فـ الضل قام ناصب
ضحك عليكوا وعليا
وداس بنعله وسب
يا قصر عالي مكملوش فيه بنا
يامّه وليدك استخسروه فيكي
لما وقف للوالي والسلطان
مسكين كادولُه والقصد كان ليكي
قتلوه وساح الدم ع العصيان
يامّه كلاب الوالي سواحة
قالوا الحقوق يا ولاد ماهيش لعبة
كل من له حق بالراحة
شيخ البلد هايجيبه مش صعبة
شيخ البلد اتاريه
ابن الكلاب منهم
فلت الكلاب تنهش
ترقص وتتغندر
و اهل البلد فـ التيه
فلتوا اللي كان بينهم
والكلب لو مانحاش
يقوى ويتقدر
يا قصر عالي مكملوش فيه بنا
عجبي ع اللي لا وصلوا ولا ضلوا
بكرة يزيد الهم علي همنا
نقعد نعاير بعض .. ونجامله
نزل المطر مواويل
قام فـ الزحام سارح
فرش الشوارع نيل
وحكاية ومطارح
لا الليل فـ ليلنا ليل
ولا الصباح رابح
ليست هناك تعليقات:
إرسال تعليق